Berkarar döwletiň täze eýýamynyň Galkynyşy döwründe, hormatly Prezidentimiz Arkadagly Serdarymyzyň we Gahryman Arkadagymyzyň pähim-paýhasly baştutanlygynda ýurdumyzda sagdyn durmuş ýörelgelerini dabaralandyrmak döwlet syýasatynyň iň ileri tutulýan ugurlarynyň birine öwrüldi. 3-nji iýunda bellenilýän bu halkara baýramy diňe bir sport çäresi däl, eýsem dünýä halklaryny parahatçylyga, sagdynlyga we daşky gurşawy goramaga çagyrýan asylly ýörelgedir.
Ekologik arassalyk (Ýaşyl Dünýä): Welosiped — daşky gurşawa hiç hili zyýanly galyndy çykarmaýan, innowasion “ýaşyl ykdysadyýetiň” we ekologik medeniýetiň iň kämil ulag guralydyr. Köpçülikleýin welosiped ýörişleri geçirilen günlerinde şäherlerimiziň howasynyň arassalygy has-da ýokary derejä ýetýär.
Saglyk we Dözümlilik: Welosiped sürmek adam bedeniniň ähli agzalarynyň, esasanam ýürek-damar ulgamynyň işini gowulandyrýar, nerw ulgamyny berkidýär we işjeňligi artdyrýar. Sagdyn nesil bolsa güýçli döwletiň binýadydyr.
Sanly ulgam we smart çözgütler: Häzirki wagtda “Smart City” (Akylly şäher) konsepsiýasy esasynda gurulýan ak mermerli paýtagtymyz Aşgabatda we akylly Arkadag şäherinde welosiped ýollary, sanly ulgam arkaly dolandyrylýan welosiped kireýine beriş (bike-sharing) beketleri ornaşdyrylýandyr. Bu bolsa innowasion tehnologiýalaryň we ekologik ulagyň ajaýyp utgaşmasydyr.
Türkmenistanda welosiped sportuny ösdürmek boýunça amala aşyrylýan işler dünýä jemgyýetçiligi tarapyndan yzygiderli ýokary baha mynasyp bolýar. Paýtagtymyzda gurlan döwrebap Welotrek sport toplumy, Aşgabadyň gözel künjeginde bina edilen “Welosiped” ýadygärligi bu sport görnüşine goýulýan uly sarpanyň nyşanydyr. Ýurdumyzda geçirilen köpçülikleýin welosiped ýörişleriniň dünýä rekordlaryny täzelemegi bolsa halkymyzyň agzybirliginiň we sagdyn durmuş ýörelgelerine bolan yzygiderli ygrarlylygynyň aýdyň subutnamasydyr.
Biz — ýaş nesiller, talyp ýaşlar hökmünde, döwletimiziň döredip berýän bu giň mümkinçiliklerinden peýdalanyp, diňe bir ylym-bilimde däl, eýsem sportda hem işjeň bolmalydyrys. 3-nji iýun Bütindünýä welosiped güni her birimizi täze maksatlara, sagdyn geljege we rowaçlyklara tarap ruhlandyrýar.
Bütindünýä welosiped güni — dostlugyň, birjahanlylygyň we durnukly ösüşiň baýramydyr. Halkymyza sagdyn we bagtyýar durmuşy sowgat eden, ýurdumyzy sportuň we parahatçylygyň merkezine öwüren hormatly Prezidentimiziň we Gahryman Arkadagymyzyň janlary sag, ömürleri uzak, belent başlary aman bolsun!
Halkara senagatçylar we telekeçiler uniwersitetiniň dil öwreniş bölüminiň 117-nji okuw toparynyň talyby
Kämilow Jöwza we halypa mugallymy Myrat Hudaýberdiýew.